ಲೆಕ್ಕಾಚಾರ

ನನ್ನ ಕೈ ಗೆರೆಗಳ ನೋಡಿ
ನೀನು ಬೆರಳುಗಳ ಲೆಕ್ಕಾಚಾರ
ಮಾಡುವಾಗೆಲ್ಲ,ನಿನ್ನ ಕಣ್ಣುಗಳಲ್ಲಿ
ನೂರು ಕಥೆಗಳು.

ಅದೇನು ಹುಡುಕುತ್ತೀಯ?
ನನಗೂ ಹೇಳು
ಇಬ್ಬರೂ ಸೇರಿ
ಹುಡುಕಿ ಹಿಡಿಯೋಣ

ನಾನು ತುಟಿಯೆರಡು ಮಾಡಿದೊಡನೆ
'ಶ್' ಎನ್ನುತ್ತೀಯಲ್ಲ
ನಿನ್ನ ಈ ಪರಿಯ ಗಣಿತಕ್ಕೆ
ನಾನೇನು ಮಾಡಬೇಕು?

ಕೈ ಹಿಂದೆಳೆದುಕೊಂಡರೆ
ಜಮದಗ್ನಿಯ ಕೋಪ ನಿನದು
ಅಬ್ಬಬ್ಬ ಯಾರಿಗೆ ಬೇಕು
ಸುಮ್ಮನಿದ್ದುಬಿಡುತ್ತೇನೆ

ಹೇಳಿ ಬಿಡಬೇಕು ಅನ್ನಿಸುತ್ತಿದೆ
ಮೂರು ತಿಂಗಳುಗಳಲ್ಲಿ
ಹೊಸ ಗೆರೆ ಮೂಡುವುದಿಲ್ಲ
ಅದೇನು ಬೇಕೋ ನೀನೆ ಬರೆದುಬಿಡು