Sunday, May 17, 2009

ನಿನ್ನೆಗಳ ಇರಾದೆ

ಹಿಂದಿನದೆಲ್ಲ ಹಿಂದೆ ಬಿಟ್ಟು
ಇಂದಿನದರಲ್ಲಿ ನಾ
ಇದ್ದು ಬಿಡಬೇಕು

ಇಲ್ಲೇ ಒಂದು ಗುಂಡಿ ತೋಡಿ
ಬೇಡದ ಬೇವ ಮುಚ್ಚಿ
ನಿಟ್ಟಿಸಿರು ಬಿಟ್ಟು ಬಿಡಬೇಕು

ಬೆಂಕಿ ಹಚ್ಚಿ,ಆ ದಿಕ್ಕಿಗೆ ಬೂದಿಯ ಹಾರಿಸಿ
ಬೆನ್ನು ತಿರುಗಿಸಿ
ಇಷ್ಟಗಲ ಬಾಯಿ ತೆರೆದು
ಸುಮ್ಮನೆ ನಕ್ಕುಬಿಡಬೇಕು

ಗಂಗೆಯ ಒಡಲಿಗೆ ತೇಲಿ ಬಿಟ್ಟು
ಎರಡು ಹನಿ ಸುರಿಸಿ
ದೊಡ್ಡ ಅಡಿಗಳನಿಟ್ಟು
ನಾಳೆಗಳ ಬರಮಾಡಿಕೊಳ್ಳಬೇಕು

ಹೀಗೆಲ್ಲ ಅಂದುಕೊಂಡದ್ದಷ್ಟೇ ಬಂತು
ನಿನ್ನೆಗಳು ನನ್ನ ಬಿಡುತ್ತಿಲ್ಲ
ನನ್ನ ಪೂರ್ಣ ಸುಡುವ ಇರಾದೆ
ಹಾಳಾದ ನಿನ್ನೆಗಳದು